என் குழந்தை

எதிர்காலத்திற்காக
நிகழ்காலத்தைத் தொலைத்தவர்களென
என் பெற்றோரை
எண்ணும் வேளையில்,
என் மடியில்
அர்த்தத்துடன் சிரித்தபடி
என் குழந்தை .....

ஊஞ்சல்

ஆட்டிவிட 
ஆளில்லாத 
பூங்காவின் ஊஞ்சல் பொழுதுகள் 
தெளிவாய் உணர்த்தும் 
தனிமையின் வலியை ....

முதுமை

 

நரைக்கத் தொடங்கும்
என் தாய் தந்தையின் முடிகளும்
என் எதிர்காலத்திற்கான
அவர்களின் கவலைகளும்
எனக்கு உணர்த்துகிறது,
காலங்கள் ஓடுவதை......
முதுமையை உணரத் தொடங்குவது,
அவர்கள் மட்டுமல்ல நானும் தான்...........

பிரிவின் வலி

(வெளிநாடுகளில் வாழும் சகோதரர்களுக்கு சகோதரிகளின் சார்பில் ஒரு கடிதம்)

பிரிவுகள் 

உறவை வலுப்படுத்தும் 

உண்மைதான் 

வார்த்தையளவில் ...

உணர்ச்சியுடன் 

சிந்தித்தால்தான் 

உள்ளத்தின் 

வலி புரியும்....

சண்டையிட்டு 

வாங்கிய அடிகளின் 

வலியைவிட 

வேதனையானது 

சண்டையிட ஆளில்லாத 

தனிமையின் வலி.....

தொலைபேசி பேச்சுக்களினால் 

வார்த்தைகளைப் 

பரிமாறிக் கொள்ளலாம்...

கழிந்த ஆண்டுகளின் வாழ்கையை????

உனக்காக 

நிகழ்வுகளைச் சேமிக்க 

முடியாவிட்டாலும்

நிகழ்ச்சியின் அனுபவங்களை 

சேமித்து வைத்துள்ளோம் 

நீ வரும் நாளை 

எதிர்பார்த்து !!!

தீர்மானம்

இன்று
எதுவும்  செய்யவில்லை
நாளை செய்வதை
தீர்மானித்ததை தவிர...!
நிம்மதியோடு
உறங்கிப்போகிறேன்
ஒவ்வொரு இரவும்....!

முற்றத்து மாமரம்

தேதி தெரியாத
என்றோ தின்ற
மாம்பழத்தை
இன்றும்
நினைவுப்படுத்துகிறது
என் வீட்டு
முற்றத்து மாமரம் .....

தோல்விப்பயணம்

பாதைகள் மறந்து 

பயணங்கள் 

மட்டுமே மிஞ்சுகிறது 

என் பயணங்களில் ......

வெற்றி நோக்கிய

வழி இதுவென 

எடுத்துவைக்கும் அடிகளுக்கு 

மட்டும்தான் தெரியும் 

அது தோல்வியாய்ப்போன 

நொடிகளின் வலி....

எட்டிப்பிடிக்கும் தொலைவில்

வெற்றிக்கனி..!

எட்டிப்பிடிக்கும் முன்

தொலைந்து விடுகிறது 

எட்டாக்கனியாகவே ....

உலகே 

தோல்விமயமென 

பிதற்றிக்கொண்டேத்  தேடுகிறேன்

தோல்வியில்லா உலகை... 

ஒரு திசைக்கு

மறு திசை 

காத்திருக்கிறது

இன்னுமொரு தோல்வி ...

அனுபவித்து

அனுபவித்து 

அலுத்துப்போன 

தோல்வியில்தான் தெரிகிறது 

வெற்றிபெறும் நம்பிக்கை

என்னிலும் 

உண்டென்று......

தரிசனம்

தரிசனத்திற்காய்

காத்திருக்கும்

நீண்ட வரிசைகளில்

பலருள் வந்து மறைகிறது

கடவுளை பற்றிய

விடைதெரியா  கேள்விகள் .......